Мұқағали Мақатаевтың 90 жылдық мерейтойына арналған «Мұқағали Мақатаев-21 ғасыр ақыны» атты әдеби-сазды кеш өтті

Ақмола облысы білім басқармасының Көкшетау қалалық білім бөлімінің жоспарына сәйкес 23 ақпан күні Көкшетау қаласындағы №17 МГ қазақтың біртуар ақыны Мұқағали Мақатаевтың 90 жылдық мерейтойына арналған «Мұқағали Мақатаев-21 ғасыр ақыны» атты әдеби-сазды кеш өтті. Мақсаты-қазақ поэзиясының мұзбалағы атанған ақынның өмірі, шығармашылығымен таныстыру, ақынның поэзия құдіреті мен әндерін таныту. М.Мақатаевтың өлеңдері арқылы оқушылардың Отанға, халқына, тілге деген сүйіспеншілік сезімдерін ояту, отаншылдыққа, ауызбірлікке тәрбиелеу. Аталған іс-шара қашықтықтан ZOOM платформасы арқылы жүргізілді. Бұл шараға «Ақмола облысы білім басқармасының Көкшетау қаласы бойынша білім бөлімі» әдістемелік кабинет меңгерушісі Шәкен Үгіл Алпысқызы және тілдік пәндер бойынша әдіскері Дюсенова Гайни Омирбаевна, Көкшетау қалалық мектептерінің қазақ тілі мен әдебиет пәні мұғалімдері қатысты. Кеш барысында Шәкен Үгіл Алпысқызы ұстаздарды, оқушыларды, әдебиет жанашырларын Мұқағали Мақатаевтың 90 жылдық мерейтойымен құттықтады.
Кеште аталған білім ұясының ұстаздары, оқушылары Мұқағалидың балалық, жастық шағы, шығармашылық жолы, ақындық асқар биігі, адами асқақ бет-бейнесі жайында сахналық көрініс қойды. Оның барысында, сондай-ақ, ақынның алапат сезімді өлмес, өшпес өлеңдері оқылып, мазмұнды, мағыналы сөзіне жазылған әсем де әдемі әндер әуеледі. Мереке соңында №17 мектеп- гимназиясының директоры Р.С.Хасенова және Г.О.Дюсенова іс-шараға қатысқан ұстаздар мен оқушыларға ұлы ақынның өмірін үлгі етіп, әдебиетте қалдырған мол мұрасын алдағы уақытта да оқып үйренуге шақырды.