Мектебімізде Наурыз мейрамы тойланды

Ұлыстың ұлы күні Наурыз мерекесі №17 орта мектеп-гимназиясында аталып өтті. Мектебіміздің бірінші қабатында  ұлттық бұйымдарға байланысты қолөнер көрмесі ұйымдастырылды.

Мемлекеттік деңгейде аталып отырған мерекенің негізгі мақсаты:оқушыларға Ұлыстың ұлы күні-Наурыз мерекесі туралы мағлұмат беру, еліміздің салт-дәстүрін, әдет-ғұрпын құрметтеуге және оқушылардың ой-өрісін дамытумен  бірге талғампаздыққа, әсемдікке баулу.

Бастауыш сыныптарда «Әз-Наурыз» атты тақырыпта  тәрбие сағаттары ата-аналардың қатысуымен өтті. Іс-шара барысында оқушылар қазақтың салт- дәстүрлерін көрсетіп, мерекелік дастархан жайып, қазақтың халық әндерін орындады.

5-11 сынып оқушылары  қазақтың көне салт-дәстүрлерін дәріптеді. Атай кететін болсақ: «Ақшомшы»,  «Босаға майлау», «Тоқымқағар», «Ұзынсары» сияқты салт-дәстүрлер. Қазақтың ұлттық салт-дәстүрлеріне байланысты көріністерде ұстаздарымыз да өз үлестерін қосты. Іс-шара барысында мерекелік дастархан жайылып, әндер тыңдалды.  Мереке соңында оқушыларымыз дене шынықтыру пәні мұғалімдерінің ұйымдастыруымен өткізілген қазақтың  «Тоғызқұмалақ», «Арқан тарту», «Аударыспақ», «Асық» сияқты қазақтың ұлттық ойындарына  белсене қатысты.