Экология күні

Экология күні

  Адамдар өмір сүріп жатқан ортаның экологиялық таза болуы – кемел болашақтың, дені сау ұрпақтың кепілі. Ал, балалардың мұны білуі, ұғынуы және экологиялық сауатты болуы аса маңызды. Сол мақсатта, яғни балалардың экологиялық сауаттылығын арттыру мақсатында «Балақай» мектеп жанындағы жазғы лагерінің бір күні «Экология күні» деп аталды. Бүгін олар табиғат және оның әр алуан құбылыстары туралы бар білгендерін естеріне түсіріп, құстар мен жануарлардың өмір сүру мекендері, ауруға ем болатын өсімдік түрлері жайындағы дәрігер Айболиттің сұрақтарына жауап берді. Аталған тақырыпта мақал-мәтелдер айтып жарысты. Қуанышқа қуаныш үстеген тағы бір іс-шара – балалардың өз қолдарымен айрықша әсемдеп жасаған гүлдері және оны көрсетіп сап түзеп жүріп шығулары болды. Барлық топтар мақтау қағаздарымен марапатталды.

Күннің екінші жартысында балалар Ш. Құсайынов атындағы қазақ музыкалық драма театры ұсынған «Алтын балапан» ертегісін тамашалады. «Ерте, ерте, ертеде...» деп басталатын есті ертегіні қызықтап, балғындар ерекше рахат сезімдерге бөленді. Бұдан соң балалардың кейбірі топтарында қимылды ойындар ойнаса, басқалары ағылшын тілінен сабақ алды. Осылайша, жаздың тағы бір жаңбырлы күні күлімдей қол бұлғап қала берді.